ഹോർമുസ് കടലിടുക്ക് അടച്ചിടുമെന്നും, യുഎസ് താവളങ്ങൾ ആക്രമിക്കുമെന്നും ഇറാന്റെ പുതിയ പരമോന്നത നേതാവ് മൊജ്തബ ഖമേനി വ്യാഴാഴ്ച സ്റ്റേറ്റ് ടെലിവിഷനിൽ വായിച്ച പ്രസ്താവനയിൽ പറഞ്ഞു.
കൊല്ലപ്പെട്ട പിതാവിന്റെ പിൻഗാമിയായി സ്ഥാനമേറ്റതിനു ശേഷമുള്ള ആദ്യ പ്രസ്താവനയാണിത്. മേഖലയിലെ എല്ലാ താവളങ്ങളും അമേരിക്ക അടച്ചുപൂട്ടണമെന്ന് ഖമേനി ആവശ്യപ്പെട്ടു. ശത്രുവിന്മേൽ സമ്മർദ്ദം ചെലുത്താൻ ലോകത്തിലെ അഞ്ചിലൊന്ന് എണ്ണ വിതരണം ചെയ്യുന്ന ഹോർമുസ് കടലിടുക്ക് അടച്ചിടുമെന്നും അദ്ദേഹം പറഞ്ഞു.
യുഎഇ വ്യോമ പ്രതിരോധം നേരിട്ടത് 268 ബാലിസ്റ്റിക് മിസൈലുകൾ
ഇറാനിയൻ ആക്രമണം ആരംഭിച്ചതിനുശേഷം, യുഎഇ വ്യോമ പ്രതിരോധം 268 ബാലിസ്റ്റിക് മിസൈലുകളും 15 ക്രൂയിസ് മിസൈലുകളും 1,514 ഡ്രോണുകളും തകർത്തു.
യുഎൻ സുരക്ഷാ കൗൺസിൽ പ്രമേയം അംഗീകരിച്ചതിനെ യുഎഇ സ്വാഗതം ചെയ്തു
ജിസിസി രാജ്യങ്ങൾക്കും ജോർദാനുമെതിരെ യാതൊരു പ്രകോപനവുമില്ലാതെ ഇറാൻ നടത്തുന്ന മിസൈൽ, ഡ്രോൺ ആക്രമണങ്ങളെ ശക്തമായി അപലപിക്കുന്ന യുഎൻ സുരക്ഷാ കൗൺസിൽ പ്രമേയം അംഗീകരിച്ചതിനെ യുഎഇ സ്വാഗതം ചെയ്തു. ഈ ആക്രമണങ്ങൾ ഉടൻ നിർത്താൻ ടെഹ്റാനോട് ആവശ്യപ്പെടുകയും ചെയ്തു.
ഒമാനിലെ സലാല തുറമുഖം ലക്ഷ്യമിട്ട് ഇറാൻ നടത്തിയ ഡ്രോൺ ആക്രമണത്തെ യുഎഇ ശക്തമായി അപലപിച്ചു
ഒമാനിലെ സലാല തുറമുഖം ലക്ഷ്യമിട്ട് ഇറാൻ നടത്തിയ ഡ്രോൺ ആക്രമണത്തെ യുഎഇ ശക്തമായി അപലപിച്ചു. ഒരു പ്രകോപനവുമില്ലാതെ നടന്ന ഡ്രോൺ ആക്രമണത്തിൽ നിരവധി ഇന്ധന ടാങ്കുകൾക്ക് കേടുപാടുകൾ സംഭവിച്ചിരുന്നു.
ഇറാനിൽ നിന്നുള്ള ആക്രമണങ്ങളെ പ്രതിരോധിക്കുന്നതായി ദുബായ്
ഷെയ്ഖ് സായിദ് റോഡിൽ ഒരു കെട്ടിടത്തിന്റെ മുൻഭാഗത്ത് ഡ്രോണിന്റെ അവശിഷ്ടങ്ങൾ വീണതിനെത്തുടർന്നുണ്ടായ സംഭവത്തിൽ ആർക്കും പരിക്കില്ലെന്ന് ദുബായ് അധികൃതർ വ്യാഴാഴ്ച അറിയിച്ചു.
