ഷാർജയിൽ ഗ്യാസ് ഉൽപ്പാദന ശേഷിയുടെ ഇരട്ടിയിലധികം ഉൽപ്പാദനം

ഷാർജ നാഷണൽ ഓയിൽ കോർപ്പറേഷൻ 'അൽ ഹദീബ ഗ്യാസ് ഫീൽഡ് വികസന പദ്ധതി'യുടെ ഒന്നാം ഘട്ടം വിജയകരമായി പൂർത്തിയാക്കി.

ഈ പദ്ധതി പൂർത്തിയാകുന്നതോടെ, കോർപ്പറേഷന്റെ നിലവിലെ ഗ്യാസ് ഉൽപ്പാദന ശേഷിയുടെ ഇരട്ടിയിലധികം ഉൽപ്പാദനം കൈവരിക്കാനാകും. പ്രാദേശിക ഷിപ്പിംഗ് തടസ്സങ്ങളും സാമഗ്രികളുടെ ലഭ്യതയിലുള്ള ബുദ്ധിമുട്ടുകളും ഉൾപ്പെടെയുള്ള വെല്ലുവിളികൾക്കിടയിലും പദ്ധതിയുടെ ഒന്നാം ഘട്ടം വിജയകരമായി പൂർത്തിയാക്കാൻ സാധിച്ചു.

ഷാർജയിലെ അൽ സജ ഇൻഡസ്ട്രിയൽ ഏരിയയ്ക്ക് വടക്ക് സ്ഥിതി ചെയ്യുന്ന ഈ മേഖലയിൽ ഗ്യാസ് ശേഖരം കണ്ടെത്തിയതിനെത്തുടർന്ന്, 2024 മെയ് മാസത്തിലാണ് പദ്ധതി ആരംഭിച്ചത്. ഒരു വർഷത്തിനുള്ളിൽ തന്നെ ഇവിടെ നിന്ന് ഗ്യാസ് ഉൽപ്പാദനം തുടങ്ങാനും കോർപ്പറേഷന് സാധിച്ചു.

2027-ഓടെ ഗ്യാസ് ഉൽപ്പാദനം വർദ്ധിപ്പിക്കുക എന്ന ലക്ഷ്യത്തോടെ, പദ്ധതിയുടെ അടുത്ത ഘട്ടത്തിനായുള്ള ഒരുക്കങ്ങൾ ആരംഭിച്ചു കഴിഞ്ഞു. 2028-ഓടെ ഈ മേഖലയിൽ സ്ഥിരമായ ഉൽപ്പാദന നിരക്ക് കൈവരിക്കാനാകുമെന്നും, ഇത് എമിറേറ്റിലെ ഭാവി ഊർജ്ജ ആവശ്യങ്ങൾ നിറവേറ്റുന്നതിൽ വലിയ പങ്ക് വഹിക്കുമെന്നും പ്രതീക്ഷിക്കുന്നു.

ഷാർജയിലെ ഏറ്റവും പ്രധാനപ്പെട്ട ഗ്യാസ് വികസന പദ്ധതികളിൽ ഒന്നാണ് ഇതെന്നും ഷാർജ നാഷണൽ ഓയിൽ കോർപ്പറേഷൻ (SNOC) സിഇഒ ഖമീസ് അൽ മസ്‌റൂയി പറഞ്ഞു.