പാം ജുമൈറയിൽ രണ്ട് പുതിയ കാൽനട പാലങ്ങൾ

റോഡ് സുരക്ഷയും ഗതാഗത സഞ്ചാരവും  മെച്ചപ്പെടുത്തുന്നതിനുള്ള ശ്രമങ്ങളുടെ ഭാഗമായി, ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA), 'ദുബായ് ഹോൾഡിംഗ് കമ്മ്യൂണിറ്റി മാനേജ്‌മെൻ്റുമായി' സഹകരിച്ച് പാം ജുമൈറയിൽ രണ്ട് പുതിയ കാൽനട പാലങ്ങൾ നിർമ്മിക്കുന്നു.

പാം ജുമൈറയുടെ പ്രവേശന കവാടത്തിനടുത്തുള്ള 'ഷോർലൈനിന്' സമീപവും, റീട്ടെയിൽ മേഖലയ്ക്ക് അടുത്തുള്ള 'ഗോൾഡൻ മൈലിലുമാണ്' ഈ പാലങ്ങൾ സ്ഥാപിക്കുന്നത്.

ഏകദേശം 16,000 താമസക്കാർക്ക് പ്രയോജനപ്പെടുന്ന ഈ പദ്ധതി, കാൽനടയാത്രക്കാർക്ക് റോഡ് മുറിച്ചുകടക്കാൻ കൂടുതൽ സുരക്ഷിതവും സൗകര്യപ്രദവുമായ മാർഗ്ഗം ഒരുക്കും.

ഈ പദ്ധതി നടപ്പിലാക്കുന്നതിലൂടെ, സമീപത്തുള്ള ജംഗ്ഷനുകളിൽ വാഹനങ്ങൾക്ക് കാത്തിരിക്കേണ്ടി വരുന്ന സമയം 50 ശതമാനം വരെ കുറയ്ക്കാനും, യാത്രാ സമയം ലാഭിക്കാനും, പാം ജുമൈറയിലെ താമസ, വാണിജ്യ, വിനോദസഞ്ചാര കേന്ദ്രങ്ങൾ തമ്മിലുള്ള ബന്ധം മെച്ചപ്പെടുത്താനും കഴിയുമെന്ന് RTA അറിയിച്ചു.

40 മീറ്റർ വീതം നീളമുള്ള ഈ രണ്ട് പാലങ്ങളിലൂടെയും മണിക്കൂറിൽ 2,700 കാൽനടയാത്രക്കാർക്ക് കടന്നുപോകാൻ സാധിക്കും. മുതിർന്ന പൗരന്മാരും ഭിന്നശേഷിക്കാരുൾപ്പെടെ (People of Determination) എല്ലാവർക്കും എളുപ്പത്തിൽ ഉപയോഗിക്കാൻ കഴിയുന്ന തരത്തിൽ ലിഫ്റ്റുകളും ഈ പാലങ്ങളിൽ സജ്ജീകരിക്കും.

ഷോർലൈൻ പാലത്തിൻ്റെ നിർമ്മാണം 2027 ജൂണിലും, ഗോൾഡൻ മൈൽ പാലത്തിൻ്റെ നിർമ്മാണം 2027 ഒക്ടോബറിലും പൂർത്തിയാകുമെന്ന് പ്രതീക്ഷിക്കുന്നു.

പാം ജുമൈറ ഉൾപ്പെടെ, ദുബായ് ഹോൾഡിംഗിന് കീഴിലുള്ള 15 പ്രദേശങ്ങളിലും വികസന പദ്ധതികളിലും റോഡ് അടിസ്ഥാന സൗകര്യങ്ങൾ മെച്ചപ്പെടുത്തുന്നതിനും, ഗതാഗത സൗകര്യങ്ങൾ വർദ്ധിപ്പിക്കുന്നതിനുമായി RTA-യും ദുബായ് ഹോൾഡിംഗും തമ്മിൽ ഒപ്പുവെച്ച കരാറിൻ്റെ ഭാഗമാണ് ഈ പദ്ധതി.