ട്രക്ക് മൂവ്‌മെന്റ് പെർമിറ്റ് നീട്ടി

ദുബായിലെ എല്ലാ റോഡുകളിലും 24 മണിക്കൂറും ട്രക്കുകൾ സർവീസ് നടത്തുന്നതിന് അനുമതി തുടരുമെന്ന് റോഡ്‌സ് ആൻഡ് ട്രാൻസ്‌പോർട്ട് അതോറിറ്റിയും (ആർ‌ടി‌എ) ദുബായ് പോലീസും അറിയിച്ചു.

വിതരണ ശൃംഖല പ്രവർത്തനങ്ങൾ വർദ്ധിപ്പിക്കുന്നതിനായി ഇനി ഒരു അറിയിപ്പ് ഉണ്ടാകുന്നതുവരെ ട്രക്കുകൾ ദുബായ് റോഡുകളിലൂടെ 24 മണിക്കൂറും സർവീസ് നടത്താൻ അനുവദിക്കുന്ന ട്രക്ക് മൂവ്‌മെന്റ് പെർമിറ്റ് നീട്ടിയതായാണ്  അധികൃതർ അറിയിച്ചത്. 
സാമ്പത്തികവും വാണിജ്യപരവുമായ പ്രവർത്തനങ്ങൾ വർദ്ധിപ്പിക്കുന്നതിനും ഗതാഗത, ലോജിസ്റ്റിക് കമ്പനികളെ കാര്യക്ഷമമായി പ്രവർത്തിക്കാൻ സഹായിക്കുന്നതിനും ദുബായിയുടെ ലോജിസ്റ്റിക്കൽ സന്നദ്ധത വർദ്ധിപ്പിക്കുന്നതിനുമാണ് ഈ നീക്കം ലക്ഷ്യമിടുന്നത്.

അതേസമയം എയർപോർട്ട് ടണലിലും അൽ ഷിന്ദഗ ടണലിലും നിയന്ത്രണങ്ങൾ തുടരും. 

മാർച്ച് 2 ന് ദുബായ് ആദ്യം ട്രക്കുകൾക്കുള്ള നിയന്ത്രണങ്ങൾ ലഘൂകരിക്കുകയും മാർച്ച് 22 വരെ തീരുമാനം നീട്ടുകയും ചെയ്തിരുന്നു.