ദുബായ്  ബിസിനസ് മേഖലയ്ക്ക് 1.5 ബില്യൺ ദിർഹത്തിന്റെ അധിക പിന്തുണ; പാക്കേജിന് അംഗീകാരം നൽകി ഷെയ്ഖ് ഹംദാൻ

ദുബായിയുടെ സാമ്പത്തിക പ്രതിരോധശേഷിയും ആഗോള മത്സരശേഷിയും കൂടുതൽ ശക്തിപ്പെടുമെന്ന് ഷെയ്ഖ് ഹംദാൻ

ദുബായ്  ബിസിനസ് മേഖലയ്ക്ക് 1.5 ബില്യൺ ദിർഹത്തിന്റെ അധിക പിന്തുണാ പാക്കേജിന് അംഗീകാരം നൽകി ദുബായ് കിരീടാവകാശിയും യുഎഇ ഉപപ്രധാനമന്ത്രിയും പ്രതിരോധ മന്ത്രിയുമായ ഹിസ് ഹൈനസ് ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം. മാർച്ചിൽ ആദ്യം 1 ബില്യൺ ദിർഹത്തിന്റെ പിന്തുണയ്ക്ക് അംഗീകാരം നൽകിയിരുന്നു. ഇതോടെ ആകെ പാക്കേജ്  2.5 ബില്യൺ ദിർഹമായി ഉയർന്നു,

 ടൂറിസം, വ്യാപാരം, വിദ്യാഭ്യാസം, കസ്റ്റംസ് സേവനങ്ങൾ എന്നിവയുൾപ്പെടെയുള്ള പ്രധാന മേഖലകളിലായി  33 സംരംഭങ്ങൾ പുതിയ പാക്കേജിൽ ഉൾപ്പെടുന്നു. ഇതിലൂടെ  ദുബായിയുടെ സാമ്പത്തിക പ്രതിരോധശേഷിയും ആഗോള മത്സരശേഷിയും കൂടുതൽ ശക്തിപ്പെടുമെന്ന് ഷെയ്ഖ് ഹംദാൻ പറഞ്ഞു.

സാമ്പത്തിക പ്രതിരോധശേഷി ശക്തിപ്പെടുത്തുന്നതിനും ആഗോള സാമ്പത്തിക കേന്ദ്രമെന്ന നിലയിൽ ദുബായിയുടെ സ്ഥാനം ശക്തിപ്പെടുത്തുന്നതിനും ആവശ്യമായ എല്ലാ തീരുമാനങ്ങളും എടുക്കുന്നതിനും തങ്ങൾ പ്രതിജ്ഞാബദ്ധരാണെന്നും അദ്ദേഹം വ്യക്തമാക്കി.