ഖസർ അൽ ഹൊസ്‌നിൽ യുഎഇ പ്രസിഡന്റ് പതാക ഉയർത്തി

യു എ ഇ പതാക ദിന ആഘോഷങ്ങളുടെ ഭാഗമായി ചൊവ്വാഴ്ച അബുദാബിയിലെ ഖസർ അൽ ഹൊസ്‌നിൽ  യുഎഇ പ്രസിഡന്റ് ഹിസ് ഹൈനസ് ശൈഖ് മുഹമ്മദ് ബിൻ സായിദ് അൽ നഹ്യാൻ യുഎഇ പതാക ഉയർത്തി. വിവിധ മേഖലകളിൽ നിന്നുള്ള 55 പ്രഗത്ഭ വ്യക്തികൾ അദ്ദേഹത്തോടൊപ്പം ചേർന്നു.

യു എഇയുടെ ഏകീകരണത്തിന്റെ  55 വർഷങ്ങളെയാണ് ഈ വ്യക്തികൾ പ്രതിനിധീകരിക്കുന്നതെന്ന് അദ്ദേഹം എക്‌സിൽ  കുറിച്ചു. യുഎഇയിലെ ജനങ്ങളാണ് രാജ്യത്തിന്റെ ഏറ്റവും വിലപ്പെട്ട സമ്പത്തെന്നും, അവരുടെ കരുത്തും അഭിമാനവുമാണ് രാജ്യത്തിന്റെ ശക്തിസ്രോതസ്സെന്നും അദ്ദേഹം കൂട്ടിച്ചേർത്തു.

"പരേതനായ ശൈഖ് സായിദും അദ്ദേഹത്തോടൊപ്പമുണ്ടായിരുന്ന ഭരണാധികാരികളും ചേർന്ന് ആരംഭിച്ച യാത്രയെ നാം ഓർക്കുമ്പോൾ, നമ്മുടെ ജനങ്ങളിലേക്ക് ആത്മവിശ്വാസത്തോടെയാണ് നാം നോക്കുന്നത്. അവരുടെ അഭിലാഷങ്ങളും നിശ്ചയദാർഢ്യവുമാണ് യുഎഇയുടെ പുരോഗതിയെയും സമൃദ്ധിയെയും തുടർന്നും മുന്നോട്ട് നയിക്കുക," ശൈഖ് മുഹമ്മദ് പറഞ്ഞു.

എല്ലാ വർഷവും നവംബർ 3-ന് ആചരിക്കുന്ന ഈ ദിനം, പൗരന്മാരും താമസക്കാരും തമ്മിലുള്ള സമാധാനപരമായ സഹവർത്തിത്വത്തിന്റെ മൂല്യങ്ങളെ ഉയർത്തിക്കാട്ടുന്നു. വിവിധ ദേശീയതകളിൽ നിന്നുള്ള പുരുഷന്മാരെയും സ്ത്രീകളെയും യുവാക്കളെയും കുട്ടികളെയും ഒന്നിപ്പിച്ചുകൊണ്ട്, യുഎഇയോടുള്ള സ്നേഹം പ്രകടിപ്പിക്കുന്ന ഒരു വേദിയായി പതാകദിനം മാറുന്നു.