ഇബോള പ്രതിരോധ പ്രവർത്തനങ്ങൾക്ക് യു എ ഇ സഹായം

യൂറോപ്യൻ യൂണിയന്റെ മാനുഷിക സഹായ വകുപ്പായ ഡിജി ഇക്കോയുമായി ഏകോപിപ്പിച്ചാണ് സഹായ പദ്ധതി

ഡെമോക്രാറ്റിക് റിപ്പബ്ലിക് ഓഫ് കോംഗോയിൽ ഇബോള പടരുന്നത്  തടയാനുള്ള ശ്രമങ്ങൾക്കായി   ദുബായ് ഹ്യുമാനിറ്റേറിയൻ മൂന്നാമത്തെ അടിയന്തര സഹായ എയർലിഫ്റ്റിന് സൗകര്യമൊരുക്കി. യൂറോപ്യൻ യൂണിയന്റെ മാനുഷിക സഹായ വകുപ്പായ ഡിജി ഇക്കോയുമായി ഏകോപിപ്പിച്ചാണ് സഹായ പദ്ധതി നടപ്പിലാക്കുന്നത്.  യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ നിർദ്ദേശപ്രകാരമാണ്  പുതിയ ദൗത്യം ആരംഭിച്ചത്. 

ഡെമോക്രാറ്റിക് റിപ്പബ്ലിക് ഓഫ് കോംഗോയിലെ ഇബോള ബാധിത സമൂഹങ്ങൾക്ക്   76 ടണ്ണിലധികം ജീവൻ രക്ഷിക്കുന്ന മാനുഷിക സാധനങ്ങൾ വഹിച്ചുകൊണ്ടുള്ള  വിമാനം ജൂൺ 21 ന് ദുബായിൽ നിന്ന് പുറപ്പെട്ട് ഉഗാണ്ടയിലെ എന്റബെയിൽ എത്തി. ശുചിത്വ കിറ്റുകൾ, ഫോർട്ടിഫൈഡ് ഫുഡ് ബിസ്കറ്റുകൾ, ടെന്റുകൾ, രണ്ട് വാഹനങ്ങൾ,  സംസ്കാര ചടങ്ങുകൾക്കുള്ള സുരക്ഷിതമായ  സാധനങ്ങൾ എന്നിവ ഇതിൽ  ഉൾപ്പെടുന്നു.

വേൾഡ് ഫുഡ് പ്രോഗ്രാം, യുണിസെഫ്, ഇന്റർനാഷണൽ ഫെഡറേഷൻ ഓഫ് റെഡ് ക്രോസ് ആൻഡ് റെഡ് ക്രസന്റ് സൊസൈറ്റികൾ എന്നിവയുൾപ്പെടെയുള്ള മാനുഷിക പങ്കാളികളാണ് ഇനങ്ങൾ  നൽകിയത്. 

മാനുഷിക സഹായത്തിന്റെ  മൂല്യം 2,23,000 ഡോളറിൽ കൂടുതലായിരുന്നു. പ്രതിസന്ധി ഘട്ടങ്ങളിൽ ദ്രുത മാനുഷിക പ്രവർത്തനങ്ങളെ പിന്തുണയ്ക്കുന്നതിനുള്ള യുഎഇയുടെ പ്രതിബദ്ധതയെ ഇത് പ്രതിഫലിപ്പിക്കുന്നുവെന്ന് ദുബായ് ഹ്യൂമാനിറ്റേറിയൻ സിഇഒ ഗ്യൂസെപ്പെ സാബ പറഞ്ഞു. മാത്രമല്ല ദുബായ് ഹ്യൂമാനിറ്റേറിയൻ, യൂറോപ്യൻ യൂണിയൻ, അന്താരാഷ്ട്ര സഹായ പങ്കാളികൾ എന്നിവ തമ്മിലുള്ള ശക്തമായ സഹകരണം ചൂണ്ടിക്കാണിക്കുന്ന പ്രവർത്തനമാണ് ഇതെന്നും അദ്ദേഹം പറഞ്ഞു.